انا هتكلم فى موضوعى عن سن المراهقة
فى البداية انا بنوتة عندى 15 سنه فى اولى ثانوى
يعنى فى مرحلة المراهقة
عشان كدا ان شاء الله هقدر افيدكو فى الموضوع دا
لانى عارفة البنت بتبقى محتاجه ايه فى المرحلة دى واحساسها ايه وعلاقتها بأمها بتبقى ازاى
احيانا بيبقى منتشر ان فكرة تربية البنات متعبة وخصوصا لو كانو فى سن مراهقة
بالعكس
تربية البنات مش متعبه خالص
هى بس بتبقى محتاجة شوية اهتمام وحنان
والمفروض ان الاهتمام والحنان د طبيعى بالنسبة لاى ام سواء عندها ولد اوبنت
لكن الحكاية بس بتفرق انه بيبقى بزياده فى تربية البنت شوية
المهم عشان مطولش عليكو انا هقلكو عناصر الموضوع
1- احساس البنت فى الفترة دى
2- طريق تعاملها مع اللى حواليها
3- طريقة تعاملها مع اصدقائها
4- طريقة تعاملها مع مامتها
5- الطريقة المعتادة للأم فى تربية بنتها فى الفترة دى
6- الطريقة اللى المفروض الأم تتبعها مع بنتها
واخيراً
7- اهمية علاقة الأم ببنتهافى الفترة دى
نبتدى بسم الله
.
.
.
.
1- احساس البنت فى الفترة دى
البنت فى الفترة دى بتحس بوحده كبيرة
عشان كده لازم تكون اسرتها محتوياها ديما عشان متتشغلش البنت بوسائل تسلية تانيه وطبعا كلها بتبقى غلط واحنا فاهمين
وكمان البنت فى الفترة دى مشاعرها بتكبر وبتبقى محتاجة لحنان اكتر واحتواء
وهو ده دور والدتها واسرتها فى انهم يحسسوها انها وسط ناس بيحبوها وتحبهم عشان احساسها بالوحدة ونقص الحنان ينكسر
2- طريق تعاملها مع اللى حواليها
عادةً هتلاحظى انها ابتدت تبقى عصبيه وعنيده
عشان كدا لازم تراعى دا وبلاش تعندى معاها اكتر او تحاولى تثيرى غضبها لان ده هيبقى فى منتهى السهولة
3- طريقة تعاملها مع اصدقائها
البنت فى الفتر دى بتقرب من اصدقائها جدااااااااااا
ودى اهم نقطة
لان اصدقائها هم الى من سنها ورغباتهم زى رغباتها وبتحس انهم بيفهموها
عشان كدا ممكن تبقى ماشية وراهم فى حجات كتير
يعنى تلبس زيهم تتعامل بطريقتهم
عشان كدا دور الام هنا مهم فى انها تتابع بنتها والبنات اللى تعرفهم
4- طريقة تعاملها مع مامتها
ممكن تلاحظى انها فى الفترة دى بتبعد عنك شوية
او مثلا كلامها ودردشتها معاكى بتقل
لان البنت فى الفترة دى بتبتدى تحتاح مساحة من الخصوصية
سواء لمشاعرها او لحياتها العامة وهكذى
وطبعا انتى المفروض تراعى النقطة دى وتديها مساحتها فى الخصوصية
5- الطريقة المعتادة للأم فى تربية بنتها فى الفترة دى
طبعا عادةً الأم فى الفترة دى مبتهتمش ببنتها اوى
او مبتقدرش مشاعرها وطريقة تفكيرها
واحتياجها لحنانها وقربها ليها خصوصا فى المرحلة دى
عشان كدا ديما بنسمع الكلمة المعتادة واللى انا شخصيا بسمعها من نص البنات ومن اصحابى
:
:
:
:
:
" انا مش بحب احكى لماما "
ودى اخطر جملة
لان لو محكتش لمامتها طيب هتحكى لمين ؟
لصاحبتها اللى اكيد وممكن اوووى فى اى وقت تجرها للغط
عشان كدا ضرورى جدا قرب الأم من بنتها فى المرحلة دى
6- الطريقة اللى المفروض الأم تتبعها مع بنتها
زى ماقولت قبل كدا ان البنت فى الفترة دى بتبقى محتاجة مساحة من الخصوصية
عشان كدة لازم الام تراعى النقطة دى وتديها حريتها فى الموضوع دا
لكن الأهم
انك تعرفيها علطول انك واثقة فيها
وتفكريها بالموضوع دا كتير
عشان تحس بالمسؤلية وانها لازم تحافظ على الثقة دى
ولازم تقربى منها
مش معنى كدة انك تخليها تحكيلك على كل حاجة وبس
لأ
اقصد قربى منها هزرى معاها اتناقشى معاها فى اى موضوع دردشى معاها وانتو فاضيين
كدا يعنى حسسيها انك صاحبتها
وبلاااااااش العنف و الزعيق والشخط والنطر
لو عملت حاجه غلط او ضايقتك كلميها براحة او بهزار
بلاش تجرحيها وتزعقيلها وتسدى نفسها دى بنى ادمة
ازاى عايزة تبقى صاحبتها وتدردشى معاها وتكونى بتزعقيلها وتشتميها او تزعليها
لو عملت حاجة كلميها بـــحــــكـــمـــة
وبعقل ورزانه كدا وبــهــــدووووووء
وصدقينى هتحبك اكتر
وكمان عشان يوم ما تعوز تحكيلك على حاجة متخافش منك او من رد فعلك
واخيراً
7- اهمية علاقة الأم ببنتها
الأم هى اللى بأديها تحدد شخصية بنتها
لو عايزاها تطلع خايبة وملهاش قرار ولا بتعرف تفرق
يبقى هتكبت حريتها علطول وهتفرض عليها رئيها ديما ومش هتديها فرصة تقرر
ولو عايزاها تطلع متدينة
هتفضل معاها علطول وتفكرها ديما بأخلاق دينها واهميته وصفاتة الجميلة واهمية التقرب لربنا وهتتابعها علطول
تقولها تعالى نصلى سوا تعالى مثلا نتسابق انا وانتى ونشوف انهى هيختم القرأن
وهكذى
ولو عايزاها تطلع صادقة
هتقرب منها وتخليها تحبها وتثق فيها عشان متكدبش عليها ومتخبيش حاجه عليها ولو بنتها عملت حاجه غلط هترد عليه بحكمة وهدوء وعقل عشان تعرفها ان الغلط مش فى اننا نكدب الغلط فى اننا نستمر فى الكدب
وهكذى وهكذى وهكذى وصفات كتير وامهات كتير وشخصيات كتيير
المهم ان الأم لازم تقرب من بنتها ديما وتصبر عليها فى كل حاجه
ولاحظى انك كل ما خلتيها ترتاح فى الكلام معاكى كل ما كسبتيها فى صفك
موضوع: بنتك فى سن مراهقة ؟ ...... طب تعالى اعرفى ازاى تتعاملى معاها وايه طريقة تفكيرها 